{祝願安康} 忽然1周第918期 : 耳膜穿 腳萎縮 81歲琴姐 腦退化

耳膜穿　腳萎縮　 81歲琴姐腦退化  2013年03月01日 ~~ 第918期 忽然１周

81歲的李香琴（琴姐），縱橫影視圈超過 60年，所飾演的奸角出神入化。去年她兩個月內在家跌倒三次，導致腰骨及股骨出現裂痕，下半身用不到力，要長期留在家中休養，自此鮮有在公開場合露面。
據知，近日琴姐健康急轉直下，不僅出入需靠輪椅代步，記憶力亦急速衰退。上周四（ 21日），本刊記者拍得她在孫新抱和兩名外傭陪同下，到理工大學的復康治療中心醫病。其間身體虛弱，神情呆滯的琴姐，需要男外傭抱起放上輪椅。
本刊記者欲上前與她做訪問，她卻側側頭說：「我聽唔到你講 嘢呀！」據知，琴姐除了患上腦退化，早前更因游水弄穿耳膜，健康狀況令人擔憂。

雙腳冇力　琴姐出入要人抱

琴姐在 2010年拍《公主嫁到》時，曾於收工後在電視城暈倒，最後被送往急症室留醫。身體響起警鐘，琴姐依然未肯言休。去年四月，她還拍了個朱古力廣告，在球場搓波時活力十足。當時她曾大爆自己記性開始轉差：「有時同人講講吓嘢都唔記得，唸唸吓經，中間又唔記得菩薩個名，你睇我幾論盡。」其後她更不幸在家中無故跌倒三次兼留醫。身體狀況急轉直下，記憶力衰退情況更加明顯，要長期留在家中休養。

孫新抱陪同

由於雙腳冇力，琴姐坐上輪椅後，亦要由外傭用手將她雙腳放上腳踏上。而當日琴姐的孫新抱（箭嘴指）亦有陪琴姐到治療中心。

據資料顯示，琴姐所到的理大復康治療中心，主要為斷骨病人做物理治療，同時亦為患腦疾病和中風病人診治。

契女頻探望

琴姐今次患病，令一直疼錫她的契女關菊英和陳寶珠非常擔心。以往農曆新年，兩個契女都會帶琴姐出外食飯，但二人為遷就契媽，在剛過去的大年初三，親自到琴姐家中作客。據知，陳寶珠為𠱁鍾意熱鬧的契媽歡心，當日更在琴姐家中與友人打足八圈麻將。

時、地、人兜亂

其實早於 11年 3月，曾傳過琴姐患上柏金遜症。當時她第一時間 call記者回應：「我係驚有啫！之前我喺節目度話有時會手震，講笑話：『唔知自己有冇柏金遜症呢？』我有定期做身體檢查，醫生淨係話我癌指數高啲，完全冇柏金遜症㗎！」
但去年中三度跌倒後，琴姐開始將時、地、人大兜亂，其家人亦擔心她腦退化。有知情者透露：「琴姐又唔係中風，無緣無故跌親咁多次，佢屋企人都好擔心佢有腦退化。無幾耐琴姐嘅記性開始出現問題，講嘢又慢咗好多，冇乜方向感，成日認錯路。有時睇電視，佢連自己啲同事名都講錯。佢啲屋企人咪帶佢睇醫生，醫生話呢個係腦退化嘅初期病徵。」

琴姐和關菊英在 70年代拍《親情》相識，直至琴姐 71歲大壽時，與關菊英正式上契。據知，大年初三當日，關菊英亦有帶密友周偉利（ Willy）上契媽家中拜年。《蘋果日報》圖片

60年，琴姐和陳寶珠合作拍《雪峰魔女》相識，以契媽、契女相稱。自此，每逢生日和過時過節，陳寶珠都會約埋琴姐一齊過。

與琴姐識於微時的余慕蓮，每星期都會去琴姐家探望她。余在電話中更透露琴姐近日其中一隻耳膜穿了，失去一邊聽力。《蘋果日報》圖片

眾星擔憂

以往聲如洪鐘、活力十足的李香琴，因三度跌倒，不良於行。加上記性日差及耳膜受損，已不能再拍劇，令人惋惜。

李司棋：唔知佢咁嚴重

「我好掛住琴姐呀！有透過公仔（關菊英）問候佢，同 update吓個狀況。我對上一次見佢係佢跌親之前，我哋有飲過茶見面，當時佢仲好精靈，好多嘢講。我真係唔知佢咁嚴重呀。其實佢整親之後都唔敢騷擾佢，你知老人家跌親少少，啲毛病就會發出嚟！」 

徐子珊：咁大件事呀！

「我上次拍嫲嫲已經係《情越雙白線》喇，之後都冇見過面。嗰時佢仲好精靈活潑。唔知佢依家咁樣，真係咁大件事呀？點都好，嫲嫲個人咁好，希望佢好番。」 

鍾嘉欣：好唔開心

與琴姐合作過《家好月圓》和《公主嫁到》的鍾嘉欣，坦言知道琴姐患病消息而感到難過。「琴姐 嗰時背劇本完全冇問題，講對白次次一 take過，精靈過我 哋班後生仔好多。聽到琴姐呢個消息都好唔開心，希望佢冇事。」 

周驄：知佢記性差！

琴姐在《公主嫁到》的好拍檔周驄坦言近數月沒與琴姐見面，但他都得悉對方病況：「我有個朋友啱啱過年有同佢拜年，話佢周不時要睇醫生。知佢記性差咗，始終年紀大。希望佢安心靜養，快啲出番嚟同我哋見面。」 

盧海鵬：年紀大冇辦法

「一年前同佢食飯，嗰陣都冇乜事，仲識講笑。之後我都冇見過佢啦，只係知道佢喺屋企休養。年紀大，自然有好多老人病，都冇辦法，希望佢冇事啦！」 

說話欠條理

上周，本刊記者曾致電琴姐。在電話中，琴姐聲線微弱，每說一句話都要停頓數秒，與以往聲如洪鐘相差很大。同時，記者發現琴姐在訪問中，思緒紊亂，情況令人憂心。當記者問她腳傷狀況時，她說：「有心，都仲有腳痛囉……今日先去做物理治療。（去邊度睇醫生？）中文大學、英文大學畢業嗰啲。（吓！你係咪講醫院？定係療養院？）唔……（咁除咗做物理治療，有冇食藥？）我尋日先去完針灸。（最近好少見你露面喎，你有冇搬屋呀？）我住何文田，銀海嗰頭囉！（即係搬咗屋？）之前住低啲，依家住高啲！（咁即係住邊？）香港囉！（哦，即係冇搬！）係囉，住高啲囉！」接住記者再問到她與無綫是否未完約，琴姐說：「之前佢哋叫我簽約，今日公司都有人打嚟話拎利是俾我。（咁仲會唔會拍劇？）唔拍啦！（係咪記唔到劇本？）唔係好記到啦！」

最後露面

去年五月，無 綫行政主席梁乃鵬請劇集《盛世仁傑》的演員食飯，當日亦是琴姐最後一次公開露面，至今已達九個月。仍未跌倒的她，當日精神飽滿，與同場的黎耀祥和呂珊有講有笑。呂珊在電話中表示：「佢唔想人騷擾佢，不過我知佢情況比以前差。」 

琴姐：我乜都冇差

記者連日發現，琴姐每星期都會在家人和外傭陪同下，到理工大學的復康治療中心醫病。據資料顯示，該中心除有替病人做物理治療，同時亦替患有中風和有腦疾病的病人診治。
上周四（ 21日），琴姐如常由司機接送到香港理工大學，其孫新抱及外傭亦在旁幫手推輪椅服侍。當七人車駛到停車場時，男外傭即快手由車尾箱抬出輪椅，打開輪椅後，才小心翼翼抱起琴姐放上輪椅。現場所見，琴姐不單消瘦不少，而且目光欠焦點，健康情況着實令人擔心。
本周二（ 26日），琴姐如常由外傭載她到理大做治療，記者再埋身和她做訪問。被問到健康情況，琴姐忽然指着耳仔說：「我聽唔到你講嘢！（你最近啲記性係咪差咗？）都冇差冇差，我乜都冇差。（咁認唔認得朋友？）認得。」
此時，琴姐身後的一名女人表示自己是琴姐的孫新抱，並說琴姐患腦退化只是報紙講，隨即命令傭人扶琴姐上七人車。琴姐臨離開時，記者再問她和無綫的合約問題，她說：「冇啦！（咁你仲會唔會返去拍劇？）我隨時都可以返去……不過我唔拍啦！」

拍劇暈倒

兩年前，琴姐在拍攝《公主嫁到》時，試過跌親和在片場暈倒。魄力過人的她，出院後即再投入劇組拍攝。 

拍廣告風趣

除了拍劇，去年四月琴姐亦接拍 Snickers朱古力廣告，在球場上跳跳紮紮，活力十足。想不到在個多月後，她即接連在家中跌倒，導致大腿和股骨有裂痕。 

剩一邊聽力

周二（ 26日），琴姐再由家人和外傭陪同到理大，其間記者與她做訪問時，她即表示自己聽唔到，示意記者問身邊的孫新抱（黃衣者）。 

堅持化妝

即使患病，注重外表的琴姐，每次到診所都會搽唇膏。而當日她在診所逗留接近兩小時才離開。 

提腳困難

當日琴姐的狀態較上一次為佳，可以扶實外傭自己行落地，不過當上七人車時，琴姐亦要由兩個外傭夾手夾腳扶她，才可上到車。 

余慕蓮：琴姐穿耳膜

上周一（ 18日），本刊聯絡琴姐好友余慕蓮，她憂心忡忡地說：「我每個星期都有探琴姐。佢依家好慘，跌咗幾次要做物理治療，又要學行路。其實早幾個月我都有帶佢去 YMCA學游水，但佢之後穿咗耳膜兼發炎，想去做運動都唔得。琴姐又食得唔好，精神麻麻，搞到成日腳軟，好在佢有女有孫有塞輪流照顧佢。唉，我都好驚腦退化㗎，依家得閒都打麻雀練下個腦。（有冇同琴姐打過？）佢點打呀？瞓下覺好過啦！（咁琴姐係咪唔認得人？）吓！我唔知喎，咁佢認得我嘅！」

注重養生

琴姐多年以來，都有服食中藥進補，更用田七、冬蟲草、藿山石斛和丹參自製養生藥粉。單單食這些藥粉，每月使費便過萬。 

女婿百萬救琴姐

琴姐連跌三次後，行動不便。連月來，其契仔契女如呂良偉、陳寶珠及關菊英等，亦接力踩上其何文田寓所探望，為她分憂解悶。
至於其女兒蕭紫筠及女婿傅蔭鎈亦對她愛護有加。據知琴姐女婿傅蔭鎈是位醫生，亦是澳門一代賭王傅老榕與四太何美仙所生的兒子，身家豐厚。自從去年琴姐三度跌倒後，他立即安排五個工人寸步不離照顧她，甚至陪住她睡覺，以免她晚上起牀時再跌親。另外，他亦買了一架七人車，請埋司機接載琴姐。起初琴姐先到東區醫院醫腳傷，同時間其女婿亦聯絡相熟名醫為外母治病。保守估計今次琴姐的醫藥費達百萬。

奸角突圍

兒時居澳門的李香琴， 16歲開始演粵劇，有「二幫王」的美譽。後經關德興引薦拍粵語片，處女作是《黃飛鴻大鬧花燈》，歷年來拍過百套電影。她擅長拍奸角，當中「西宮娘娘」一角跟余麗珍的「東宮娘娘」分庭抗禮，自此成為「一代奸后」。
其後，她曾與譚炳文合辦「歡樂影片公司」，擔正拍喜劇《大鄉里》，二人更傳出緋聞。 1972年，她加入無綫，轉戲路改演慈母，兼成為《歡樂今宵》的台柱之一。不過她在 80年代尾過檔亞視拍劇。直至 2007年底，她才回巢無綫，拍劇集《盛世仁傑》、《溏心風暴之家好月圓》及《公主嫁到》。活躍演藝界六十年的她，在《 2011年萬千星輝頒獎典禮》奪得「萬千光輝演藝人大獎」。

29歲的李香琴

李香琴當晚攞獎時，仲識講笑話：「好似幻覺咁，我未曾攞過獎㗎！」

腦退化冇得預防

據家庭醫生關嘉美表示，腦退化症在 70歲以上的老人家中常見，在香港大約有 1成老人家患上。「好多人將腦退化症同柏金遜症混淆，前者即係老人癡呆症，後者係一種腦疾病。其實腦退化症嘅成因不明，初期徵狀有記性差、唔識計數、控制唔到自己嘅情緒、心情差同脾氣暴躁。「由於腦退化，大腦協調能力差，患者會好易仆親。去到後期，患者會出現食唔到嘢同大小便失調等情況。腦退化症都有特效藥，分口服同藥貼，可改善腦神經乙醯膽素（ Acetylcholine）嘅運作。不過到現時為止，都冇一隻藥可以完全根治腦退化症。」 


李香琴, 耳膜穿, 腳萎縮, 81歲, 琴姐, 腦退化, 忽然1周, 退化, 跌倒, 耳膜, 七人, 家中, 本刊, 陪同, 露面, 物理, 女婿

資料引自 : http://tvb4life.pixnet.net/blog/post/133429876

---